Policia e Tiranës ka arrestuar një nga autorët e dyshuar të grabitjes me armë zjarri të argjendarisë në Kamëz. Në pranga ka përfunduar Elez Hysa nga Kruja.
Sipas burimeve, 22-vjeçari i arrestuar së bashku me një person tjetër, dyshohet se kanë bashkëpunuar për të kryer grabitjen me armë zjarri në Kamëz, pasi prej disa ditësh kanë vëzhguar lëvizjet në këtë biznes.
Pasi morën bizhuteri dhe sende me vlerë miliona lekë, dy agresorët u larguan drejt Zall Herrit dhe nëpërmjet fshatrave të tjerë kanë arritur deri në Krujë.
Gjatë arratisjes mësohet se u kanë rënë në tokë disa bizhuteri.
Brenda banesës së autorit të dyshuar që u kap nga policia, blutë gjetën rroba dhe sende të tjera të djegura në banesë, të cilat dyshohet se i ka përdorur gjatë grabitjes.
Ndërkohë janë gjetur edhe kuti bojërash, të cilat dyshohet se janë përdorur për lyerjen e motorit, për të shmangur zbulimin nga policia.
Para hetuesve i riu e ka mohuar përfshirjen në grabitje.
22-vjeçari rezulton me precedent për kultivim kanabisi. Blutë ende nuk kanë gjetur as motorin dhe armën e zjarrit që u përdor për të kryer grabitjen.
Ndërkohë që grupi hetimor po punon për arrestimin e autorit tjetër, i cili është identifikuar nga kamerat e sigurisë.
