Kryetari i Partisë Demokratike, Sali Berisha shfrytëzoi takimin e Asamblesë së Përgjithshme të “The Centrist Democrat International” e cila është organizata më e madhe politike e qendrës së djathtë për të kërkuar ndihmën e partive aleate për të ngritur një grup pune për lidhjet e krimit me qeverinë në Shqipëri.
Gjatë takimit në Bruksel Berisha akuzoi Kryeministrin Edi Rama se e ka shndërruar vendin në një narko shtet, dhe sipas tij janë bandat kriminale ato që sot qeverisin vendin.
“Besoj se organizatat tona duhet të krijojnë një grup të posaçëm pune për kartelet e drogës, narko-shtetet dhe trafikun. Kjo do të ishte një ndihmë shumë e madhe, sepse vende të tilla nuk janë të rrezikshme vetëm për veten e tyre, por janë të rrezikshme për rajonin dhe madje edhe përtej tij”, tha Berisha.
Berisha denoncoi në Bruksel edhe librin “Albanian Files” i cili sipas tij tregon se Kryeministri e trajton vendin si pronën e tij.
“Ky libër trajton 523 projekte të mëdha në peizazhet më të bukura të Shqipërisë, në bregdet ose në zonat malore, për të cilat askush nuk kishte dijeni. Kryeministri, kreu i organizatës kriminale, e konsideron vendin si çifligun e tij, si një sulltan i shekujve të kaluar, që mund të vendosë për gjithçka. Shumica e këtyre projekteve janë nxjerrë nga zonat e mbrojtura”, tha kreu i PD.
Gjatë takimit të asamblesë së përgjithshme të organizatës së Qendrës së Djathtë Demokrate Berisha denoncoi kryeministrin Rama se nuk lejon zhvillimin e zgjedhjeve sipas standarteve ndërkombetare.
