Numri i viktimave nga zjarri që përfshiu një pub në Bangkok është rritur në 30, pasi tre persona të tjerë humbën jetën nga plagët e rënda, njoftuan autoritetet tajlandeze.
Sipas hetimeve paraprake, zjarri shpërtheu si pasojë e një qarku të shkurtër në një kondicioner të vendosur në çatinë e ndërtesës. Policia po heton nëse neglizhenca dhe shkeljet e rregullave të sigurisë kanë ndikuar në përmasat e tragjedisë.
Deri tani janë identifikuar 27 viktima, ndërsa tre të tjera mbeten të paidentifikuara. Shumica e tyre besohet se ishin shtetas tajlandezë. Nga të plagosurit, 24 ndodhen në gjendje kritike, 15 kanë lëndime të rënda, ndërsa 36 persona me plagë më të lehta janë kthyer në shtëpi.
Shefi i Policisë Kombëtare tha se pista kryesore e hetimit është neglizhenca. Autoritetet po verifikojnë nëse daljet e emergjencës ishin të aksesueshme në momentin e zjarrit.
⚠️ GRAPHIC ⚠️
🇹🇭 A deadly fire 🔥 at Rong Beer Na Lat Phrao restaurant in #Bangkok‘s Chatuchak district, killed at least 27 as per local media.🔥 Horrific video footage showed an intense blaze in the building as people tried to flee in panic as their clothes caught fire.
Many… pic.twitter.com/MQFpng8aj7
— Shafek Koreshe (@shafeKoreshe) July 12, 2026
Sipas hetuesve, shumica e viktimave u gjetën të bllokuara në tualete pa dritare pranë një daljeje të pasme. Dyshohet se rruga e daljes ishte bllokuar nga një tavolinë e vendosur në korridor ose nuk ishte e dukshme për shkak të errësirës. Gjithashtu, një tjetër dalje pranë kuzhinës ishte pjesërisht e penguar nga rafte dhe dollapë, ndërsa ka indicie se disa dyer emergjence mund të kenë qenë të kyçura.
Kryeministri i Tajlandës u informua se një derë që më parë shërbente si dalje emergjence ishte mbyllur me dry, pasi pronari kishte frikë se klientët mund të largoheshin pa paguar. Dera mbante shenjën “Vetëm për personelin”, çka mund të ketë penguar klientët ta përdornin gjatë panikut.
Hetimet po përqendrohen gjithashtu te materialet e përdorura në tavanin mbi skenë dhe instalimi elektrik, për të përcaktuar nëse janë respektuar standardet e sigurisë.
Tragjedia ka tronditur opinionin publik në Tajlandë, ndërsa dëshmitë e të mbijetuarve dhe familjarëve të viktimave përshkruajnë skena dramatike gjatë përpjekjeve për t’i shpëtuar flakëve.
/vizionplus.tv
