Kur ka qenë hera e fundit që keni bërë një foto brenda një treni shqiptar? Hera e fundit që jeni ulur duke pritur në një stacion? Këto kujtime për shumë shqiptarë janë të shkuara, e për një brez më të ri as që njihen. Për këtë qëllim delegacioni i Bashkimit Evropian, solli në kuadër të ditëve të Europës, aktivitetin Terminal: Kur ka qenë hera e fundit?
“Stacionet si ky stacion treni janë hapësira që depertohen dhe do të depertohen nga kujtesa jonë, qoftë ajo individuale apo kolektive. Le te mendojmë sa njerëz kanë kaluar këtu, janë përqafuar këtu.
Këto janë histori dhe largime, siç ka ndodhur me qindra shqiptarë që janë larguar, e të tjerë që janë kthyer.
Jam i sigurt që do të ketë të tjerë që kthehen e të japin kontributin e tyre për të ardhmen e Shqipërisë, që do të jetë në BE, e ky është dhe misioni i punës time. Prandaj organizime të tilla marrin një rëndësi për vetë mesazhin që përcjellin”, tha Silvio Gonzat, ambasador i BE.
Nëse çdo gjë shkon sipas parashikimeve, treni për udhëtarët do të rikthehet në 2030-en. Drejtori i hekurudhës Ergys Vjerdho bëri me dije se fituesi i tenderit për linjën Hani i Hotit – Shkodër – Tiranë do të shpallet në vjeshtë.
Të pranishmit u bënë pjesë e manovrave të makinistëve dhe shijuan performancat pop-up, jazz si dhe interpretimin e poezive.
