Qeveria do të kompensojë transportin publik me 50 lekë për litër karburanti. Në një dalje për mediat pas mbledhjes së qeverisë, ministri i infrastrukturës Enea Karakaçi, bëri me dije se kjo masë subvencionuese do të nisë që nga muaji mars, periudhë kur nisi kriza e hidrokarbureve.
“Në mbledhjen e qeverisë kaluam disa akte, por ajo që do ndalem është një akt i rëndësishëm i marrë në kuadër të masave subvencionuese që qeveria shqiptare ka marrë në kohën e krizës së hidrokarbureve. Bëhet fjalë për masën e subvencionimit për transportin qytetas, ndërqytetas dhe rreth qytetas. Para një muaji u ulëm me shoqatat e transportit dhe kemi dëgjuar shqetësimet e tyre. Në atë kohë dhamë fjalën që do kishim një masë subvencionuese siç kishim edhe në 2022. Sot e kemi miratuar, bëhet fjalë një kompensim 50 lekë për litër për të gjitha shoqëritë e transportit publik, qytetas, ndërqytetas dhe rrethqytetas. Këta masë do ta fillojmë që në muajin mars”, tha ministri.
Pyetur nëse qeveria do të heqë taksën e qarkullimit për shkak të vendosjes së pagesës për akset e reja rrugore ministri u shpreh se ky vendim nuk merret për sa kohë ka rrugë alternative.
“Është absurde të thuhet që të gjithë rrugët po bëhen me pagesë dhe jua shpjegova që të gjitha rrugët kanë alternativë me standarde të larta”, tha Karakaçi.
Ndërkaq, ministri i financave, Petrit Malaj sqaroi se qeveria do të marrë masa në mënyrë që qytetarët të mos kenë problematika me shërbimet për shkak të mbylljes së përkohshme të portalit “e-Albania”.
“Nëse do ketë vonesa për qytetarët qeveria do të marrë masa në mënyrë që të mos ketë problem për shërbimet e qytetareve”, tha Malaj.
Nga data 15 deri në datën 18 maj, qeveria ka njoftuar se portali “e-Albania” nuk do të jetë funksional pasi do t’i nënshtrohet një procesi përditësimi.
