Kryeministri Edi Rama deklaroi se marrëveshja me Italinë për emigrantët do të vijojë për sa kohë që fqinjët përtej Adriatikut do ta kërkojnë. Një ditë pas reagimit në platformën X për mediat italiane, ku u shpreh se deklaratat e ministrit të Jashtëm Ferit Hoxha janë nxjerrë jashtë kontekstit, këtë të mërkurë Rama theksoi se citimet e shkurtuara sollën konfuzion.
“Tani që ti me bujari publikove transkriptin e plotë, është krejtësisht e qartë se citimi i shkurtuar ishte mjaftueshëm çorientues që kushdo me një interes ideologjik të caktuar ta përdorte sipas dëshirës së vet. Në fund të fundit, thelbi mbetet i pandryshuar: Çfarë Italia kërkon nga Shqipëria, Italia e merr nga Shqipëria”, tha Rama.
Debati nisi pas një interviste të ministrit të Jashtëm Ferit Hoxha, për Euracativ, ku ai citohej të kishte thënë se marrëveshja me Italinë nuk do të zgjatej përtej mandatit 5 vjeçar sepse deri atëherë, Shqipëria do jetë vend anëtar i BE-së.
Kjo solli një valë reagimesh. Vetë ministri e më pas edhe kryeministri deklaruan se fjalët ishin nxjerrë jashtë kontekstit nga mediat italiane. Madje Rama, nënvizoi se marrëveshja për kampin në Gjadër, do të zgjasë për sa kohë që e dëshiron Roma zyrtare. Ky postim i tij u shpërnda edhe nga Kryeministrja italine Georgia Meloni, e cila falenderoi homologun shqiptar.
Ndërkohë, reagimi i kësaj të mërkure, erdhi pasi Euracativ publikoi fjalën e plotë të kryediplomatit shqiptar, ku thuhej: Po ju them se pas pesë vitesh, sapo Shqipëria të anëtarësohet, kjo nuk është më ekstraterritoriale. Është territor i Bashkimit Evropian. Së pari, është për pesë vjet dhe nuk jam i sigurt nëse do të ketë një zgjatje. Së dyti, nuk do të ketë zgjatje sepse ne do të jemi anëtar të Bashkimit Evropian.
Marrëveshja me Italinë për emigrantët, u nënshkrua mes kryeministrit Rama dhe Melonit në vitin 2023.
