Ministri për Evropën dhe Punët e Jashtme, Ferit Hoxha, ka zhvilluar një takim me homologun ukrainas, Andrii Sybiha, ku në fokus ishin zhvillimet e fundit në Ukrainë, siguria evropiane dhe bashkëpunimi mes dy vendeve.
Në një postim në rrjetin social X, Hoxha theksoi se diplomacia nuk zhvillohet vetëm në sallat zyrtare të takimeve, por edhe në momente informale mes angazhimeve ndërkombëtare.
Sipas tij, biseda me kryediplomatin ukrainas u përqendrua te lufta në Ukrainë dhe përpjekjet për t’i dhënë fund agresionit rus, ndërsa Shqipëria rikonfirmoi mbështetjen e saj të palëkundur ndaj Kievit.
“Shqipëria ka qëndruar fuqishëm përkrah Ukrainës që nga dita e parë e agresionit brutal rus dhe do të vazhdojë ta mbështesë Ukrainën me përkushtim të plotë, në çdo mënyrë të mundshme”, shkroi Hoxha.
Dy ministrat diskutuan gjithashtu mbi procesin e integrimit evropian të Shqipërisë dhe Ukrainës, duke vlerësuar rëndësinë e ruajtjes së ritmit në rrugën drejt anëtarësimit në Bashkimin Evropian.
Në fokus të bisedës ishin edhe marrëdhëniet dypalëshe dhe aktivitetet e ardhshme diplomatike, ku u konfirmua se në muajin qershor, Tirana do të mirëpresë një takim ministror kushtuar Ukrainës.
Takimi, sipas Hoxhës, do të shërbejë për të forcuar bashkëpunimin dhe angazhimin e përbashkët për paqe, siguri dhe stabilitet rajonal.
Ministri Ferit Hoxha postim në X:
Diplomacia nuk kufizohet vetëm në sallat formale të takimeve; ajo zhvillohet kudo, edhe gjatë pritjes për fluturimin e radhës drejt angazhimit të ardhshëm.
Me kënaqësi pata një shkëmbim të frytshëm dhe thelbësor me Ministrin e Punëve të Jashtme të Ukrainës, Andrii Sybiha, mbi zhvillimet më të fundit në Ukrainë, përpjekjet e vazhdueshme për t’i dhënë fund luftës së padrejtë agresive të Rusisë, si dhe mbi panoramën më të gjerë të sigurisë evropiane.
Shqipëria ka qëndruar fuqishëm përkrah Ukrainës që nga dita e parë e agresionit brutal rus dhe do të vazhdojë ta mbështesë Ukrainën me përkushtim të palëkundur, në çdo mënyrë të mundshme.
Gjithashtu, shkëmbyem pikëpamje mbi rrugëtimin tonë respektiv drejt Bashkimit Evropian dhe nënvizuam rëndësinë e ruajtjes së ritmit për procesin e anëtarësimit evropian të të dy vendeve.
Diskutimi ynë preku gjithashtu marrëdhëniet dypalëshe dhe aktivitetet e ardhshme, përfshirë një takim ministror që do të mbahet në qershor në #Tiranë, duke rikonfirmuar bashkëpunimin tonë të ngushtë dhe angazhimin e përbashkët për paqe, siguri dhe stabilitet rajonal.
