Tregtarët e tregut të fruta-perimeve, por dhe ata të tregut industrial në qytetin e Vlorës, janë mbledhur këtë të hënë serish në protestë pasi nuk janë lejuar të hyjnë jo vetëm në ambientet e tregut, por as në dyqanet e tyre.
Ata thonë se situata ka ardhur si pasojë e punimeve për rikonstruksionin e tregut të madh të qytetit, investim i cili ka nisur prej pak ditësh.
Lexo edhe :
Related Posts
Ata shprehen se bllokimi i hyrjes po u shkakton humbje të konsiderueshme ekonomike, pasi kanë mallra me vlerë miliona lekë që rrezikojnë të dëmtohen.
Ndërkohë, pas protestës, kryetarja e Bashkisë së Vlorës, Brunilda Mersini, u shpreh se tregtarët janë njoftuar prej pesë muajsh për zhvendosjen e mallrave dhe lirimin e ambienteve, në përputhje me afatet e përcaktuara nga vendimi i Këshillit Bashkiak.
“Ky ka qenë një debat i lindur në fund të muajit dhjetor. Në fillim të muajit janar jemi takuar me tregtarët, kryesisht me tragtarët e fruta-perimeve por dhe me ata industrial dhe kemi kërkuar që të gjenim një pikë të përbashkët. Kjo ka qenë e pamundur sepse ata nuk kanë rënë dakord për zona të cilat i kemi propozuar ne si bashki. Nga muaji shkurt vendimi i Këshillit Bashkiak ishte shumë i qartë, që do ketë dy tregje. Rehabilitimi i tregut është një vepër publike që në radhë të parë u shërben atyre. Shpesh ka qenë shqetësim i gjithë banorëve dhe qytetarëve pasi kushtet në të cilat tregtonin ishin kushte jashtë standardeve për sigurinë ushqimoe”, thotë Mersini.
Mersini deklaroi gjithashtu se është vënë në dispozicion një strukturë tjetër në zonën e Çoles, si edhe tregu industrial, ku tregtarët mund të ushtrojnë aktivitetin e tyre gjatë periudhës së rikonstruksionit.
Sipas saj, këto ambiente janë të lira dhe të gatshme për t’u përdorur nga tregtarët, të paktën për një vit, që është edhe afati i parashikuar për përfundimin e punimeve në tregun ekzistues.
“Ky është një investim i duhur, brenda parametrave. Brenda një viti besoj se do të përfundojnë punimet dhe ata do të rikthehen në vendin e tyre. Tregtarët janë të njohur me vendimin e Këshillit Bashkiak prej muajit shkurt dhe ka qenë një kërkesë e tyre që të kishin kohë të merrnin masa për të gjetur pozicione të tjera. Koha ka qenë e mjaftueshme”, thotë Mersini./vizionplus.tv
