Seanca e dytë gjyqësore e ish-presidentit Ilir Meta shënoi përplasje të forta mes avokatit dhe gjyqtarëve të çështjes për transmetimin direkt. Edhe një herë avokati Kujtim Cakrani i qëndroi kërkesës që e gjithë seanca të transmetohet pa asnjë kufizim.
Kujtim Cakrani: Ky është procesi i vitit, mediat duhet ta transmetojnë live. Nuk duhet t’i ndalini mediat për transmetim live. Nuk keni asnjë bazë ligjore të ndërprisni transmetimin live të mediave. Ja dinjiteti njerëzor, presidenti në kafaz me xhama. Ku e keni dinjitetin me këto sallat e reja ja ku janë tenderat. Presidenti në kafaz, me kë talleni ju s’jemi budallenj.
Edhe Monika Kryemadhi mbështeti kërkesën, duke thënë se publiku ka nevojë të njihet me të gjitha provat që kanë palët në process.
Monika Kryemadhi: Ky intimidim dhe linçim që më është bërë mua dhe ish-burrit tim, duhet të jetë e hapur që shqiptarët të shohin provat. Jam dakord me kërkesat e avokatit Cakrani . Sallat janë tipike amerikane, por ka një ndryshim edhe vrasësit serialë atje ulen me avokatin përkrah.
Debati nuk u ndal këtu, pasi të pranishëm në seancë ishin edhe deputeti Klevis Balliu dhe Tedi Blushi të cilët kërkuan që gjyqi të ndiqet publikisht.
Megjithatë gjykata e rrëzoi këtë kërkesë me arsyetimin: Gjykata çmon se regjistrimi me kamera ose transmetimi drejtpërdrejt i seancës përbën një formë të ekzagjeruar të publicitetit. Mund të cenojë parimin e pafajësisë, në proces do të thirren dëshmitarë dhe transmetimi drejtpërdrejt përbën cenim të jetës private.
Relatimi i akt akuzës që lidhet me Cez-Dian u shoqërua gjithashtu me debate mes palëve. Prokurori Sotir Kllapi lexoi një mesazh të shkëmbyer mes Metës e Kastriot Ismailajt, ku i thoshte qe “ditën tjetër i duhej 200 mijë” por avokatët ndërhynë, duke thënë se interpertimi tij është i gabuar dhe se ai mesazh është adninistruar në mënyrë të paligjshme. Më herët gjykata rrëzoi edhe kërkesën e Ilir Metës për lirimin e tij nga qelia.
