Gjykata e Posaçme kundër Korrupsionit dhe Krimit të Organizuar po shqyrton kërkesën e ish-Presidentit Ilir Meta për zëvendësim të masës së sigurisë.
Seanca u zhvillua në mungesë të Metës, i cili ka dërguar një deklaratë ku shprehet se do të marrë pjesë në procesin në themel, ndërsa në sallë ishte i pranishëm avokati i tij.
Në seancë morën pjesë edhe Tedi Blushi, Flamur Noka dhe Bujar Leskaj.
Avokati i Metës, Cakrani, argumentoi se ish-presidenti ndodhet në paraburgim prej rreth 19 muajsh pa një vendim të formës së prerë, ndërsa çështja tashmë është në fazën e gjykimit në themel.
Sipas tij, masa “arrest në burg” duhet të aplikohet vetëm kur masat e tjera konsiderohen të pamjaftueshme dhe kufizimet duhet të jenë në përputhje me Konventën Europiane të të Drejtave të Njeriut.
Cakrani kërkoi zëvendësimin e masës “arrest me burg” me një masë më të butë, duke përmendur edhe raste të tjera gjyqësore ku masa të ngjashme janë ndryshuar gjatë procesit.
Avokati Cakrani: Nga 21 tetori i 2024 e deri më sot, Meta, ish-president i Republikës dhe aktualisht President i Partisë së Lirisë rri në paraburgim pa një vendim të formës së prerë. Tashmë dosja ndodhet në fazën e gjykimit.
“Arresti në burg” mund të vendoset vetëm kur çdo masë tjetër është e papërshtatshme. Kufizimet nuk mund të tejkalojnë parashikimet e Konventës Europiane të të Drejtave të Njeriut. Meta ka 19 muaj në paraburgim. Gjykimi në themel ende nuk ka filluar dhe nuk dihet kur do të përfundojë.
GJKKO e justifikoi masën me faktin se i pandehuri mund të dëmtojë provat duke intimiduar dëshmitarët. Rreziku i intimidimit të dëshmitarëve mbetet spekulativ. Prokuroria thotë që do prishë prova, por se cilat janë provat nuk e thotë. Prokuroria thotë që do të intimidojë dëshmitarët, por nuk thotë se cilët dëshmitarë do të intimidojë.
Ne kërkojmë që ish-presidenti të ketë një masë më të butë. Nga ana tjetër, Gjykata e Posaçme ka argumentuar më herët se masa e paraburgimit lidhet me rrezikun e prishjes së provave dhe ndikimit te dëshmitarët. Mbrojtja e Metës ngriti gjithashtu pretendimin se kushtet për mbajtjen në paraburgim kanë ndryshuar dhe kërkoi që gjykata të rishikojë vendimin.
