Ditën e sotme kryeministri Edi Rama dhe Negociatorja për Kapitullin 5 “Prokurimi Publik”, njëkohësisht Drejtore e Përgjithshme e Agjencisë së Prokurimit Publik, Reida Kashta kanë mbajtur një konferencë për mediat për të folur se ku qëndron sot Shqipëria në fushën e prokurimeve publike, si rezultat i një reforme modernizuese antikorrupsion.
Gjatë fjalës së saj, Kashta theksoi se vendi po zhvillon negociatat në dy drejtime kryesore: procesin e prokurimit publik në kuadër të Kapitullit 5 dhe aderimin e Shqipërisë në Marrëveshjen e Prokurimit Publik të Organizatës Botërore të Tregtisë, proces që po zhvillohet në koordinim me Bashkimin Evropian. Ajo nënvizoi se BE-ja e konsideron sistemin shqiptar të prokurimit publik të gatshëm për t’u bërë pjesë e kësaj marrëveshjeje, ndërsa shtoi se Shqipëria po vijon punën për përmbushjen e kushteve përmbyllëse të Kapitullit 5, që lidhen me përafrimin ligjor, forcimin e kapaciteteve institucionale dhe garantimin e rezultateve të qëndrueshme.
Reida Kashta: Jemi duke zhvilluar negociatat në dy drejtime në fushën e Prokurimit Publik, fusha e parë është procesi i prokurimit dhe Kapitulli 5. Çështja tjetër me të cilën po negociojmë është aderimi i Shqipërisë në marrëveshjen qeveritare të prokurimit publik që është nën organizatën botërore të tregtisë. Edhe ky proces po zhvillohet në koordinimin e BE-së. BE është shprehur se sistemi i prokurimit publik shqiptar është gati të bëhet pjesë e kësaj marrëveshjeje. Kushtet mbyllëse të Kapitullit 5 janë tre; Shqipëria përafron kuadrin ligjir me atë të BE, Shqipëria vendos kapacitetet e duhura administrative institucionale në të gjiha nivelet dhe Shqipëria demostron që ka të dhëna të qëndrueshme. Do të vijojmë punën për të përmirësuar treguesit në ato indikatorë që kemi ende punë për të bërë.
