Ekspertët janë të mendimit se qeveria nuk ka bërë sa duhet për të tërhequr kapitalin e diasporës në vend.
Samiti i kësaj jave për Romina Radonshiqin ishte më shumë një event me karakter politik sesa ekonomik.
“Nuk pamë se çfarë nismash do të ndërmarrë qeveria për diasporën në këtë event. Ishte pozitive që u bënë bashkë të gjithë aktorët, por unë e pash më shumë si një event politik. Mendoj se duhet të ketë thirrje apo politika të dedikuara për diasporën. Deri më tani nuk ka të tilla”, tha Radonshiqi në Vizion Plus.
Sipas të dhënave, janë 1.1 miliardë euro të ardhurat që sjellin emigrantët në rrugë ligjore në Shqipëri, për vitin 2025.
Këto shifra kanë ardhur në rritje vit pas viti, por ndërkohë potenciali i diasporës është disa herë më i lartë
“Të ardhurat e diasporës janë shumë të rëndësishme, ato para sot përdoren për konsum. Ndërkohë diaspora ka mundësi të mëdha ekonomike, që të ndikojë në zhvillimin ekonomik të vendit dhe në rritjen ekonomike, jo vetëm nëpërmjet investimeve, por edhe ekpsertizës që shumë emigrantë kanë përftuar nga jetesa në vende të ndryshme të botës”, u shpreh ajo.
Sipas Radonshiqit Shqipëria është e vonuar për të patur një plan veprimi se ku është dhe ku do të arrijë me diasporën.
/vizionplus.tv
