Tensionet në Lindjen e Mesme janë rritur ndjeshëm pas paralajmërimeve të forta ndaj Iranit nga Donald Trump i cili la një afat 48-orësh për japjen e Ngushticës së Hormuzit.
Në rast bllokimi apo kërcënimi të trafikut detar do të ndërmerren sulme të drejtpërdrejta ndaj infrastrukturës energjetike iraniane, përfshirë termocentralet dhe rrjetin energjetik kombëtar ishte paralajmërimi i kreut të Shtëpisë së Bardhë.
Në përgjigje, Irani ka deklaruar se mund të godasë centralet energjetike izraelite si dhe instalimet që furnizojnë bazat amerikane në Gjirin Persik.
Për situatën ka reaguar drejtori ekzekutiv i Agjencisë Ndërkombëtare të Energjisë duke thënë se kriza është shumë e rëndë dhe se ekonomia globale po përballet me një kërcënim shumë të madh.
“Dhe jo vetëm nafta dhe gazi, por edhe disa nga arteriet jetësore të ekonomisë globale, siç janë petrokimikatet, plehrat, squfuri, heliumi, tregtia e të cilave është ndërprerë, gjë që do të kishte pasoja serioze për ekonominë globale”, tha ai.
Ndërkohë, Izraeli ka intensifikuar operacionet ushtarake në Liban. Forcat izraelite kanë goditur një urë me rëndësi strategjike, e cila shërben si nyje kyçe për transportin dhe furnizimin brenda vendit.
Në të njëjtën kohë, sistemet e mbrojtjes ajrore të Izraelit kanë vijuar të interceptojnë raketa të lëshuara nga Irani.
Hezbollah gjithashtu ka paralajmëruar “surpriza” ushtarake kundër Izraelit, me theks të veçantë në përdorimin e dronëve dhe taktikave të avancuara sulmuese.
Situata në terren mbetet shumë e paqëndrueshme me objektiva energjetike dhe infrastrukturore që po shndërrohen në pika kryesore të përplasjes.
