Liverpooli ka përmbysur gjithçka në “Anfield Road” mbrëmjen e sotme përballë Galatasarayt, duke shënuar katër gola. Ndeshja e transmetuar në ekranin e televizionit kombëtar Vizion Plus ishte një spektakël i vërtetë.
Turqit e Galatasarayt, pavarësisht fitores 1-0 një javë më parë në Stamboll, nuk mundën të bënin asgjë përballë “të kuqve” të Arne Slot, të cilët dominuan krejt takimin. Goli i parë i Liverpoolit erdhi në minutën e 25-të të pjesës së parë nga Szoboszlai, ndërsa Salah shpërdoroi një penallti në fund të 45 minutave të para.
Me nisjen e pjesës së dytë, Liverpooli shënoi dy gola brenda dy minutash me anë të Ekitike dhe Gravenberch. Ndërsa Mohamed Salah shlyeu gabimin në minutën e 62-të, duke realizuar golin e katërt të takimit.
Ndërkohë, Bayern Munich edhe në sfidën e dytë përballë Atalantës, pavarësisht mungesave të shumta, fitoi me rezultatin e thellë 4-1.
Harry Kane realizoi dy gola këtë mbrëmje, ndërsa Diaz dhe Karl çuan rezultatin në 4-0, para se Samardzic të shënonte golin e nderit në këtë takim.
Pas përballjeve të sotme janë kompletuar edhe katër çiftet që do luajnë më 7 dhe 8 prill ndeshjet e para çerekfinale. Sporting Lisbonë vs Arsenal, PSG vs Liverpool, Real Madrid vs Bayern Munich dhe Barcelona vs Atletico Madrid do jenë përballjet e fazës së radhës, teksa bie në sy derbi spanjoll apo ‘Klasikja’ Real Madrid – Bayern Munich.
