Vizita e kryeministrit Edi Rama në SHBA dhe fjalimi i tij në inaugurimin e Bordit të Paqes ishin pjesë e diskutimit në panelin e “Quo Vadis” të moderatores Pranvera Borakaj në Vizion Plus.
E ftuar në studio, gazetarja Bruna Çifligu theksoi se Rama bëri dy gabime thelbësore: pozicionimin hapur në krah të SHBA-së për Bordin e Paqes, në një kohë kur një pjesë e Evropës është kundër, si dhe deklaratat për fëmijët e Gazës, pasi pak kohë më parë vlerësonte kryeministrin e Izraelit.
Pjesë nga biseda:
Çifligu: Rama ndër të tjera ka thënë: “BE nuk e pranon Bordin e Paqes. Unë nuk jam dakord kështu”. Thënë kjo nga kryeministri shqiptar më duket njëlloj servilizmi ndaj Trump, duke qenë se Gjermania, Franca, Britania nuk kanë qenë aty. Nëse Bordi i Paqes synon të zëvendësojë OKB-në, qoftë kështu. Për mua kjo tregon papjekurinë e një kryeministri të një vendi të vogël. Për pjesën se si është shprehur për Bordin e Paqes, merr njëlloj anësie të pavend. Është kujtuar zoti Rama në Uashington të flasë për fëmijët e Gazës. Para disa muajsh i ka bërë elozhe kryeministrit izraelit, u kritikua edhe në Shqipëri. Këto janë dy momente që zoti Rama nuk duhet të jetë kaq i hapur për çështje kaq të ndjeshme dhe që kanë ndasi.
Minga: Ne jemi në një fazë që Bordi i Paqes do të merret vetëm me Gazën. Aty doli qartë që do të ketë 17 miliardë, 10 nga amerikanët, 7 nga popujt arabë. Roli ynë do të jetë ekip trajnues për policët aty. Nuk ka asnjë lloj barre nga prania në Bord.
Borakaj: Nuk është çështje teknike, është praktike.
Çifligu: Rama ka përfituar nga diplomacia. Trump i tha Presidentes së Kosovës: “Po pate problem me Vuçiç, më merr në telefon”. E njëjta gjë mund të ndodhë edhe me ne; nëse kemi problem me Greqinë, Rama telefonon Trump. Është shumë e rëndësishme të jesh pjesë e klubit.
