Ceremonia e ndarjes së çmimeve Grammy e këtij viti ka shkaktuar polemika të forta politike. Një përplasje në distancë është shënuar mes presidentit të SHBA Donald Trump dhe prezantuesit Trevor Noah.
Përmes postimeve të tij në platformën Truth Social, presidenti amerikan i përshkroi çmimet Grammy si “çmimet më të këqija të të gjitha kohërave”, duke shtuar se rrjeti televiziv CBS është “me fat” që eventi nuk do të përfshihet më në axhendën e tij.
Në të njëjtën kohë, Trump shënjestroi Trevor Noah , duke e krahasuar ironikisht me Jimmy Kimmel dhe duke folur për “vlerësime të ulëta” të krahasueshme me atë të Oscarëve.
Arsyeja për zemërimin e Trump ishte një koment i bërë nga Noah në skenë, pas dhënies së çmimit të këngës së vitit për Billie Eilish. Prezantuesi bëri shaka se çmimi është “pothuajse aq i kërkuar sa Greenland për Trump”, duke shtuar një vijë të mprehtë që lidhte Trump dhe Bill Clinton me ishullin e Jeffrey Epstein .
Presidenti amerikan mohoi kategorikisht çdo lidhje me të ashtuquajturin “Ishulli Epstein”, duke e përshkruar komentin si “të rremë dhe shpifës” dhe duke kërcënuar hapur me veprime ligjore kundër Noah.
Reagimi i Donald Trump:
Çmimet Grammy janë MË TË KEQATA, pothuajse të pamundura për t’u parë! CBS është me fat që këto mbeturina nuk janë më në programin e tyre televiziv. Prezantuesi, Trevor Noah – kushdo që të jetë ai – është pothuajse aq i keq sa Jimmy Kimmel në Oscar me shikueshmëri të ulët. Noah tha, GABIME, se unë dhe Bill Clinton kaluam kohë në Ishullin e Epstein. GABIME!!! Nuk mund të flas në emër të Bill, por unë nuk kam qenë kurrë në Ishullin e Epstein , ose diku afër tij, dhe deri sonte, me këtë deklaratë të rreme dhe shpifëse, asgjë e tillë nuk është thënë kurrë, madje as nga Media e Lajmeve të Rreme. Noah, një humbës total, më mirë t’i sqarojë faktet e tij shpejt dhe me saktësi. Duket se do t’i dërgoj avokatët e mi për të paditur këtë prezantues patetik, pa talent dhe të paaftë, që kërkon shumë para. Pyete “të voglin” George Stephanopoulos dhe të tjerët se si përfundoi e gjithë kjo. Pyete edhe CBS! Përgatitu, Noah. Do të kaloj mirë me ty!/vizionplus.tv
