Pesë persona kanë mbetur të lënduar nga aksidenti i ndodhur pasditen e sotme në liqenin e Komanit, në zonën e Vaut të Dejës, pas përplasjes së dy mjeteve lundruese.
Katër prej të lënduarve janë shtetas shqiptarë, tre nga Lezha dhe një nga Durrësi. Ata janë transportuar me helikopter drejt Spitalit të Shkodrës, ku po kryejnë kontrolle më të imtësishme mjekësore. Të katër personat ndodhen jashtë rrezikut për jetën.
Ndërkohë, një shtetas i huaj, i cili gjithashtu mbeti i lënduar, po transportohet drejt Spitalit të Traumës në Tiranë për të marrë ndihmën e nevojshme mjekësore, pasi ndodhet në gjendje më të rëndë.
Në dy mjetet lundruese ndodheshin edhe turistë të tjerë të huaj, të cilët nuk kanë pësuar dëmtime.
Policia dhe grupi hetimor vijojnë veprimet për zbardhjen e plotë të rrethanave dhe shkakut të aksidentit.
