Gazetari i Vizion Plus, Esido Barkaj, ka siguruar foton e 20-vjeçarit portugez Luis Miguel Varela Mendes, i cili u vra me thikë një ditë më parë në një lokal në Ksamil.
Ngjarja e rëndë ndodhi në orët e para të mëngjesit të së martës, pas një konflikti mes disa personave në lokal.
Për ngjarjen është arrestuar 29-vjeçari Sokrat Vata, i cili u vu në pranga disa orë pas krimit.
Ditën e sotme, Vata ka dhënë deklarimet e para përpara grupit hetimor, duke paraqitur versionin e tij mbi dinamikën e ngjarjes.
Sipas dëshmisë së tij, konflikti ka nisur fillimisht mes turistëve, të cilët dyshohet se ndodheshin nën efektin e alkoolit. Vata ka pretenduar se u ka kërkuar të qetësoheshin, pasi në lokal ndodheshin edhe persona të tjerë, por situata më pas ka agravuar dhe ka kaluar në përplasje fizike.
29-vjeçari ka deklaruar se thika me të cilën u godit viktima nuk ishte e tij, por i përkiste 20-vjeçarit. Sipas versionit të Vatës, gjatë përleshjes ai ia ka marrë thikën nga dora viktimës dhe më pas e ka goditur.
Ndërkohë, grupi hetimor ka sekuestruar kamerat e sigurisë së zonës, me qëllim zbardhjen e plotë të dinamikës së ngjarjes. Nga pamjet e siguruara janë fiksuar momentet e para të konfliktit, por ato nuk japin një pasqyrë të qartë të vijimit të përplasjes, për shkak të lëvizjes së personave.
Momenti i goditjes me thikë nuk është filmuar, pasi ngjarja ka ndodhur në një pjesë të largët dhe në errësirë.
Sipas policisë, 20-vjeçari portugez kishte mbërritur në Shqipëri rreth një javë më parë, së bashku me disa miq.
Ndërkohë, familjarët e viktimës nuk janë paraqitur ende në polici për tërheqjen e trupit.
