Ish-deputeti demokrat Ervin Salianji, gjatë një takimi me qytetarë dhe mbështetës në Korçë, ka theksuar nevojën për bashkim të opozitës dhe riorganizim të Partisë Demokratike, duke vënë theksin te dëgjimi i shqetësimeve të demokratëve dhe hapja ndaj shoqërisë.
Në deklaratën e tij para takimit, Salianji u shpreh se mbështetja që po merr është e dukshme dhe masive, duke nënvizuar se as kushtet e vështira atmosferike nuk i kanë ndalur qytetarët të marrin pjesë.
“Kam mbështetje masive, njerëz që nuk i ka ndaluar as shiu, as bora dhe as ngrica për të ardhur në takim”, u shpreh ai.
Sipas Salianjit, domosdoshmëria kryesore për opozitën mbetet bashkimi i çdo opozitari, duke nisur nga bashkimi i Partisë Demokratike, si dhe dëgjimi i shqetësimeve të demokratëve në çdo cep të vendit. Ai theksoi gjithashtu rëndësinë e një hapjeje reale ndaj shoqërisë dhe aktorëve të tjerë jashtë politikës.
Në lidhje me protestat kundër qeverisë, Salianji deklaroi se ai dhe demokratët do të jenë pjesë e çdo proteste opozitare, por nënvizoi se opozita duhet të reflektojë edhe mbi vetveten.
Sipas tij, protestat aktuale nuk përmbushin gjithmonë pritshmëritë e shoqërisë dhe të vetë demokratëve, duke e bërë të domosdoshëm një riorientim të qartë politik.
