Ministrja e Shëndetësisë Evis Sala, ka ndarë vizionin dhe objektivat kryesore për transformimin e sistemit shëndetësor në Shqipëri, gjatë një interviste në podcastin “Flasim” të kryeministrit Edi Rama. Në fokus të saj janë reformimi i financimit të shëndetësisë, përmirësimi i aksesit në trajtimin onkologjik, dhe ndërtimi i një strukture funksionale e të qëndrueshme menaxhimi.
Sala u shpreh se një ndër sfidat kryesore është riorganizimi i mënyrës se si menaxhohet mjekësia dhe fondi i sigurimeve. Sipas saj, edhe pse mjekësia është falas për qytetarët, ajo ka një kosto reale që mbulohet nga shteti, ndaj është jetike krijimi i një sistemi transparent që përfshin sigurimet, kontrollin e kostove dhe financimin bazuar në rezultate.
“Duhet të largohemi nga praktika e buxheteve historike dhe të ndërtojmë një sistem ku paratë ndjekin shërbimin dhe efektivitetin. Mjekësia nuk është falas ajo kushton, por ne duhet të garantojmë që qytetari ta marrë falas, pa kompromentuar cilësinë”, tha Sala.
Me një përvojë të gjatë në fushën e onkologjisë, ministrja theksoi edhe rëndësinë e përmirësimit të trajtimit të pacientëve me sëmundje kancerogjene. Ajo shprehu angazhimin personal për të siguruar akses të plotë në barnat onkologjike, por brenda një protokolli të qartë dhe të standardizuar.
“Kam përgjegjësi personale për onkologjinë. Duhet të sigurojmë që shërbimi të shkojë te pacienti dhe jo e kundërta. Qytetarët kanë nevojë për akses të drejtë dhe të lehtë në trajtim”, tha ajo.
Ministrja ndau gjithashtu përjetimet e para në detyrë, duke i cilësuar si “sfida të bukura”, që kërkojnë jo vetëm reagim të shpejtë, por edhe zgjidhje afatgjata dhe sistematike. Ajo u shpreh e vendosur për të ndërtuar një skuadër profesionale dhe për të bashkëpunuar ngushtë me strukturat përkatëse për të përmbushur këto objektiva.
“Ka vullnet dhe dëshirë për ndryshim. Ajo që kërkohet tani është një vizion i qartë dhe punë konkrete në terren”, përfundoi Sala.
/vizionplus.tv
