Për herë të dytë është paraqitur në Gjykatën e Posaçme, në procesin për pronat e Ervis Martinaj, babai i tij, Mustafa Martinaj. Seanca u shty sërish për shkak të mungesës së dy avokatëve.
Pas seancës, në një prononcim për gazetarët, Mustafa Martinaj deklaroi se nuk ka asnjë lëvizje nga autoritetet për zbardhjen e ngjarjes së zhdukjes së djalit të tij.
“Nuk duan ta zbardhin, prandaj e lënë në Kurbin, pasi ua kam dhënë koordinatat e sakta dhe emra konkretë”, tha ai.
Sipas Martinajt, pjesë e interesit për moszbardhjen e ngjarjes janë edhe drejtues të Policisë Kriminale gjatë viteve të fundit.
“I kam thënë të gjitha në SPAK kur erdha dhe dëshmova me kërkesën time. Askush nuk është interesuar që atëherë”, përfundoi Martinaj.
Në tetor të 2025-ës, babai i Ervis Martinaj bëri edhe një lëvizje në Gjykatën e Lezhës, ku kërkoi që djali i tij të shpallet zyrtarisht i zhdukur, çështje e cila ende nuk ka vendimmarrje. Për Prokurorinë e Posaçme, përsa kohë nuk ka asnjë provë që të faktojë të kundërtën, Ervis Martinaj konsiderohet i gjallë.
Ervis Martinaj është i shpallur në kërkim ndërkombëtar, me urdhër të SPAK, pas dëshmive të të penduarit të drejtësisë, Nuredin Dumani i cili ndër të tjera ka thënë se Martinaj e kishte paguar 500 mijë euro për të vrarë Indrit Doklen.
/vizionplus.tv
