8 tampona janë dërguar në Tiranë nga Korça gjatë 24 orëve të fundit, të cilat fatmirësisht kanë rezultuar negative. Burime zyrtare nga Njësia Vendore e Kujdesit Shëndetësor bëjnë të ditur se të 8 personat e dyshuar kanë qenë kontakte të afërta me oficerin e policisë kufitare, i cili rezultoi pozitiv me COVID-19, një ditë më parë.
Qyteti i Korçës ka në total 17 raste të prekurish nga koronavirusi, prej të cilëve 7 persona janë shëruar, duke përfshirë këtu edhe mjeken korçare, e cila rezultoi pozitive dy javë më parë, ndërsa një ditë më parë ka marrë përgjigjen e negativitetit ndaj COVID-19.
Nga ana tjetër nje lajm i mirë vjen edhe për qytetarët e Devollit, ku një person i dyshuar si i prekur nga virusi ka rezultuar negativ, ndërkohë edhe zonja nga Bilishti me banim në Tiranë, e prekur nga COVID-19, duket se ka pasur një kohë të gjate pa shkuar në qytetin e lindjes.
Kjo është vërtetuar falë gjurmimit të rasteve nga ana e mjekëve epidemiologë të Devollit, të cilët kanë arritur në përfundimin se zonja nuk ka pasur kontakte të afërta në Bilisht gjatë kësaj periudhe, çka do të thotë se Devolli vijon ende të jetë i paprekur zyrtarisht nga COVID-19.
