Kryeministri Edi Rama ka reaguar pas sulmeve të bëra nga 10 mijë llogari në rrjetet sociale ndaj bizneseve dhe hoteleve në Shqipëri, të cilat i kanë dhënë një goditje të rëndë turizmit.
Përmes një postimi në rrjetet sociale Rama shkruan se jehona e turpit “alla shqiptarçe” arriti deri në majën e piramidës së Google, ku autoritetet tona kërkuan ndihmë për të nxjerrë një sërë sipërmarrjesh nga “BLOZA E TERRORIT DIGJITAL” të ushtruar prej pengmarrësve të protestës së flamingove.
Postimi i Ramës:
👉 Jehona e një TURPI ALLA SHQIPTARÇE arriti deri në majën e piramidës së Google, ku autoritetet tona kërkuan ndihmë për të nxjerrë një sërë sipërmarrjesh nga BLOZA E TERRORIT DIGJITAL të ushtruar prej pengmarrësve të protestës së flamingove, të cilët përmes 10 mijë llogarive të hapura enkas organizuan dhe orkestruan një SULM TË PADËGJUAR KRIMINAL mbi hotele, bujtina, restorante, duke u hequr me DHUNË yjet e mbledhura nga përshtypjet pozitive të klientëve👺
Pra, logjika e hurit dhe drurit që i ka dhënë protestës ngjyrën e sorrave e zërin e korbave: Nuk duam investorë të huaj, nuk duam biznese vendase, duam litar, burg, zjarr – tip naziskinësh me qeleshe e komunistash me flamur në qafë, laro e balo të duartrokitur me pasion nga dështakëzemërakë të rënë nga vakti, plot urrejtje, ligësi e mediokritet të pangushëllueshëm🤡
Policia vijon me hetimin e skemës kriminale, ndërkohë që me ndihmën e Google-it faqet e sipërmarrjeve po u rikthehen yjet e merituara me punë e mund të madh😍
Kujtojmë që edhe ekspertët turistikë i kanë cilësuar klëto sulme të orkestruatra si mjaft të dëmshme për biznesin dhe vendin në këtë periudhë të sezonit turistik.
