Klejvis Caka, i njohur edhe me mbiemrin Lusha, është shpallur në kërkim nga policia si autor i dyshuar i plagosjes me armë zjarri të 28-vjeçarit Juglen Abazi. I riu 26-vjeçar, banues në Tiranë, është identifikuar përmes kamerave të sigurisë në zonë, pasi vetë i plagosuri nuk ka dhënë detaje të qarta mbi autorin.
Ndaj Cakës rëndojnë disa vepra penale, përfshirë “Vrasje me dashje” e mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”.
Policia e Tiranës ka arrestuar në flagrancë Xhonatan Qerimin, 27 vjeç, banues në Tiranë, i dyshuar për veprën penale “Përkrahje e autorit të krimit”. Po ashtu, është shpallur në kërkim edhe Andi Gurra, 26 vjeç, banues në Tiranë, për të njëjtën vepër penale.
Sipas hetimeve paraprake, të mbështetura nga pamjet filmike dhe dëshmitarë në vendngjarje, dyshohet se Qerimi dhe Gurra kanë ndihmuar autorin e dyshuar të largohet menjëherë pas plagosjes.
Policia po heton në pistën e një konflikti mes palëve, por ende nuk është sqaruar nëse përplasja ishte e çastit apo rrjedhojë e një mosmarrëveshjeje të mëparshme.
Ngjarja ndodhi mbrëmjen e 2 gushtit në zonën e Freskut, ku Juglen Abazi po lëvizte me automjetin e tij tip “Mercedes” dhe u qëllua me armë zjarri nga Klejvis Caka. Autori, pas kryerjes së plagosjes, është larguar qetësisht nga zona dhe më pas është ndihmuar nga dy bashkëpunëtorët e tij.
I plagosuri ka braktisur menjëherë automjetin dhe, pranë vendngjarjes, ka gjetur kunatin e tij, i cili e ka transportuar me urgjencë në spital, duke i shpëtuar jetën. Abazi ka marrë një plumb në këmbë dhe ndodhet jashtë rrezikut për jetën. Mjekët po monitorojnë gjendjen e tij dhe pritet që në ditët në vijim të jetë në gjendje të japë një dëshmi më të qartë, pasi deri më tani ka dhënë deklarata kontradiktore, duke u treguar i rezervuar ndaj bashkëpunimit me policinë dhe duke tentuar të minimizojë ngjarjen.
Hetimet vijojnë për zbardhjen e plotë të rrethanave dhe kapjen e personave të shpallur në kërkim.
/vizionplus.tv
