Ambasadorja e Shteteve të Bashkuara të Amerikës Yuri Kim e pranishme në konferencën “Kostot e Demokracisë” i bëri një apel partive politike për të mos kandiduar persona me të shkuar kriminale apo lidhje me korrupsionin, por edhe të bëjnë një transparencë të plotë të financave të tyre.
Drejtuesit e partive duhet të heqin nga listat çdo politikan të lidhur me krimin e korrupsionin dhe jo ti vendosin ata në krye të listave. Zbatimi i plotë i ligjit të dekriminalizimit është thelbësor për të ardhmen euro-atlantike të Shqipërisë, por ata që shfaqen në lista janë vetëm një pjesë e zgjedhjes së problemit. Partitë politike duhet të marrin seriozisht detyrimin e tyre për transparencë të financimeve. I bëjmë thirrje të gjithë partive politike të bëjnë transparente financat e fushatave të tyre si dhe të bëjnë publike asetet financiare të të gjithë kandidatëve. Ashtu siç i kërkuam sistemit të drejtësisë që të verifikojë integritetin e gjyqtarëve dhe prokurorëve, ne i bëjmë thirrje drejtuesve të partive të verifikojnë me hollësi kandidatët për deputetet.
Kim e përforcoi mesazhin e saj, kur bëri apel që partitë politike të mos fyejnë votuesit.
Gjithashtu po punojmë me partitë politike duke i inkurajuar, ndonjëherë ndoshta edhe duke i mërzitur, për të përmbushur detyrimet e tyre ligjore dhe për të punuar për të rritur besimin e qytetarëve shqiptarë duke hartuar një listë kandidatësh që nuk i fyen votuesit, që nuk nënvlerëson demokracinë dhe nuk promovon korrupsionin.
E për integritetin e figurave, ambasadorja Yuri Kim nuk u ndal vetëm tek ligji i dekriminalizimit.
Është përgjegjësia e drejtuesve të partive që të sigurojnë që listat e kandidatëve janë të pastra dhe të përdorin standard të rrepta, të parashikuara në ligjin e dekriminalizimit, por të bëjnë dhe më të mirën e tyre, për të parë se cilët mund të përfaqësojnë më së miri qytetarët shqiptarë. Qytetaret shqiptarë meritojnë të kenë besim në institucione e tyre. Ata meritojnë që votat e tyre në hidhen në një proces transparent, pa presion kriminal dhe korrupsioni. Ata meritojnë që të shohin drejtuesit e partive dhe përfaqësuesit e tyre në parlament, duke i shërbyer interesit të shqiptarëve. Përgjegjësia për të përmirësuar sistemin elektoral në Shqipëri nuk bie vetëm mbi një person, një institucion apo një parti politike, por mbi të gjithë ne.
Ambasadorja Kim e mbylli fjalën e saj me një thirrje për të gjithë qytetarët që të mos e shesin votën.
