Ambasadorja amerikane në Tiranë Yuri Kim u ka kërkuar të gjithë institucioneve shtetërore të punojnë me shpejtësi për të bërë funksionale gjykatën kushtetuese deri ne fund të vitit.
Në një postim në rrjetin social twitter diplomatja amerikane ka përsëritur apelin drejtuar liderëve politikë që të garantojnë drejtësi për qytetarët shqiptarë.
YURI KIM
AMBASADORE E SHBA
“Është mirë të shoh progres drejt bërjes funksionale të gjykatës kushtetuese deri në fund të këtij viti. kanë mbetur 6 javë; presidenca, parlamenti dhe institucionet e drejtësisë duhet të vazhdojnë të punojnë me urgjencë. faleminderit këshillit të emërimeve në drejtësi që siguroi kandidatë të kualifikuar. udhëheqësit duhet të përmbushin premtimin dhënë qytetarëve të Shqipërisë për drejtësi!”
Për shkak të dorëheqjeve dhe shkarkimeve si pasojë e procesit të vetingut Shqipëria ka mbetur pa gjykatë kushtetuese prej vitit 2018.
Në mënyrë që kushtetuesja të zhvillojë mbledhje në seancë plenare e të marrë vendime duhen minimalisht 6 anëtarë, ndërkohë që sot vetëm 4 gjyqtarë po punojnë.
Aktualisht këshilli i emërimeve në drejtësi ka në proces vlerësimi kandidatët për 3 poste në këtë gjykatë dhe ende është e paqartë nëse brenda 6 javëve vendi do të ketë një gjykatë kushtetuese funksionale.
