Ka përfunduar pas 5 orësh mbledhja e grupit Parlamentar të PS-së dhe kabinetit. Kryeministri Edi Rama pas mbledhjes është larguar nga Pallati i Brigadave.
Në mbledhjen e Grupit Parlamentar të PS të mbajtur me dyer të mbyllura, kryeministri Edi Rama ka kërkuar nga deputetët që të jenë më shumë prezent në rrjetet sociale.
“Ne nxjerrim një punë dhe nuk merr algoritëm”, mësohet të ketë thënë kryeministri në mbledhje.
Sipas Ramës deputetët duhet të nxjerrin punët që bën qeveria me argumentat përkatës.
Në një moment Rama i është drejtuar Braçes duke thënë: Nxjerr Erioni koshat e mbushur me mbeturina por nuk nxjerr koshat e pastra.
Replika e Braçes për këtë çështje drejtuar kryeministrit ka qenë se e bën këtë gjë se nuk ka gjetur zgjidhje.
“E bëj këtë gjë sepse nuk ka gjetur zgjidhje”, mësohet të ketë thënë Braçe.
Mes shumë diskutimesh, Rama në mbledhje foli edhe për investimin në Zvërnec. Ai tha se çështja mori përmasa ndërkombëtare në një kohë shumë të shkurtër, duke theksuar se shumë njerëz që nuk e njihnin zonën apo projektin, krijuan qëndrime të forta mbi të.
Sipas Ramës, reagimet ndaj projektit nuk u bazuan në analiza të detajuara, por u ndikuan nga emocione, perceptime dhe debate ideologjike që shkojnë përtej kufijve të Shqipërisë.
Rama iu përgjigj gjithashtu zërave kritikë duke theksuar se anëtarësimi në Bashkimin Europian mbetet objektivi strategjik i Shqipërisë.
Sipas tij, procesi i integrimit përfshin të gjitha çështjet që qytetarët po ngrihen në protestë, nga ekonomia te arsimi dhe mirëqenia sociale.
Mbledhja erdhi në një moment të ndjeshëm politik, kur prej disa ditësh në vend po mbahen protesta qytetare kundër projektit të parashikuar në Zvërnec dhe ndryshimeve në ligjin për zonat e mbrojtura.
Takimi gjithashtu u zhvillua në një kohë kur mazhoranca po përballet edhe me largimin e një deputeteje nga radhët e saj, atë të Marjana Koçekut, e cila kryesonte listën e socialistëve të Shkodrës.
