Shefja e Komisionit të BE-së dhe kandidatja e Partisë Popullore Evropiane (EPP) e qendrës së djathtë për Zgjedhjet Evropiane, Ursula von der Leyen, u zotua të “luftojë” “miqtë e Putinit” të ekstremit të djathtë, të cilët dëshirojnë të “rrëmbejnë” të ardhmen e Evropës.
Duke nisur fushatën e saj elektorale në Athinë, Ursula von der Leyen sulmoi presidentin rus Vladimir Putin dhe aleatët e tij evropianë.
Ajo tha se në zgjedhjet e ardhshme të BE-së në qershor, “Evropa jonë e bashkuar dhe paqësore po sfidohet si nga brenda ashtu edhe nga jashtë”.
Duke përshkruar kërcënimet e shumta me të cilat përballet Evropa tani, ajo tha: “Rusia jo vetëm që përpiqet të fshijë Ukrainën nga faqja e dheut. Por agresioni i Rusisë është më i gjerë: Ndërmarrja e sulmeve hibride kundër Evropës për vite me radhë. Qoftë nëpërmjet sulmeve kibernetike apo manipulimit të mediave sociale apo instrumentalizimit të emigrantëve.”
Ajo shtoi se “miqtë e Putinit këtu në Evropë” po përpiqen të “rishkruajnë historinë tonë dhe të rrëmbejnë të ardhmen tonë, qoftë nën maskën e populistëve apo demagogëve”.
“Pavarësisht nëse kjo është AfD në Gjermani, Rassemblement National në Francë, Konfederacja në Poloni apo të tjera, emrat mund të jenë të ndryshëm, por qëllimi është i njëjtë: Ata po shkelin vlerat tona dhe duan të rrëmbejnë të ardhmen tonë.”
Kandidatja kryesore e EPP-së për një mandat të dytë në krye të Komisionit të BE-së shtoi: “Në ditët, javët dhe muajt në vijim, detyra jonë është të luftojmë kundër tyre.”
Nga ana e tij, kryeministri grek Kyriakos Mitsotakis, i cili, së bashku me homologun e tij polak Donald Tusk, propozuan Von der Leyen për një mandat të dytë në Komisionin e BE, tha se Evropa nuk ka vend për eksperimente.
Në fjalimin e tij, Mitsotakis sulmoi partitë opozitare socialiste dhe të majta, duke thënë se kriza ekonomike zgjati më gjatë në Greqi sepse “populizmi e pengoi atë të ringjallet”.
Mbrojtja e BE-së: “Shenja” e së ardhmes
Duke iu referuar mbrojtjes, ajo theksoi se Evropa duhet të rrisë shpenzimet kolektivisht.
“Evropa duhet të shpenzojë më shumë”, tha Von der Leyen.
Duke përshkruar një nga premtimet e saj kryesore zgjedhore, ajo tha: “Meqë lufta nuk i përket të shkuarës në Evropë, bashkëpunimi në mbrojtje duhet të jetë shenja e së ardhmes në Evropë. Dhe kjo është pikërisht ajo që ne do të mbrojmë në këtë fushatë.”
Në frontin ekonomik, von der Leyen vuri në dukje se ekonomia sociale e tregut dhe konkurrueshmëria e Evropës duhet të rriten dhe mbështeti Marrëveshjen e Gjelbër.
“Tani ne duhet të vazhdojmë të mbështesim industrinë tonë dhe bizneset e vogla për ta zbatuar,” tha ajo./vizionplus.tv
