Ende pa nisur mirë fushata për zgjedhjet e parakohshme në Britaninë e Madhe, presidenti amerikan Donald Trump ka sulmuar liderin e opozitës Jeremy Corbyn.
Në një intervistë për një radio britanike, Trump është shprehur se Corbyn si kryeministër do të ishte një zgjedhje e keqe për Britaninë e Madhe.
“Nuk jam i sigurt nëse Corbyn është aq i mirë. Corbyn do të ishte një zgjedhje e keqe për vendin tuaj. Ai do të jetë aq i keq sa mund ta shpjerë vendin në një rrugë të keqe.”
Por Jeremy Corbyn ka reaguar menjëherë. Me anë të një postimi në Twitter udhëheqësi i Laburistëve e ka cilësuar mendimin e Trump si ndërhyrje të papranueshme.
“Trump po përpiqet të ndërhyjë në zgjedhjet në Mbretërinë e Bashkuar për të mbështetur mikun e tij Boris Johnson.”
Ndërsa për kryeministrin në largim Boris Johnson, Trump tha gjatë intervistës se ai është një njeri fantastik.
“Johnson më ka folur dhe unë e di që ai ndodhet në një pozitë shumë të vështirë aktualisht. Unë mendoj se ai është i gatshëm të bëjë për vendin atë që askush tjetër nuk do ta bënte dot. Ai është një njeri fantastik dhe unë mendoj se ai është djali i duhur për kohën.”
Për marrëveshjen tregtare mes Britanisë së Madhe dhe Bashkimit Europian, Trump tha se është i gatshëm të arrijë një kompromis që do të ishte në të mirë të të dyja palëve.
