Presidenti amerikan Donald Trump ka njoftuar nisjen e një operacioni për të mundësuar kalimin e sigurt të anijeve të vendeve të treta nëpër Ngushticën e Hormuzit.
“Vende nga e gjithë bota, pothuajse të gjitha, të cilat nuk janë të përfshira në mosmarrëveshjen e Lindjes së Mesme që po zhvillohet kaq dukshëm dhe dhunshëm, për të gjithë, i kanë kërkuar Shteteve të Bashkuara nëse mund të ndihmojmë në lirimin e anijeve të tyre, të cilat janë të bllokuara në Ngushticën e Hormuzit, për diçka me të cilën ata nuk kanë absolutisht asnjë lidhje. Ata janë thjesht kalimtarë neutralë dhe të pafajshëm!”, tha Trump.
Në një postim në rrjete sociale, Trump shkrun se “Projekti Liri” është një gjest humanitar, duke shtuar se shumë anije po mbarojnë ushqimet.
“Lëvizja e Anijeve ka për qëllim thjesht të çlirojë njerëzit, kompanitë dhe vendet që nuk kanë bërë absolutisht asgjë të gabuar. Ata janë viktima të rrethanave. Ky është një gjest humanitar në emër të Shteteve të Bashkuara, vendeve të Lindjes së Mesme, por, në veçanti, të Vendit të Iranit. Shumë prej këtyre Anijeve po mbarojnë ushqimet dhe gjithçka tjetër e nevojshme që ekuipazhet e mëdha të qëndrojnë në bord në një mënyrë të shëndetshme dhe sanitare”, tha Presidenti.
Por ushtria iraniane këmbëngul se e kontrollon ngushticën dhe se do të sulmojë çdo forcë të armatosur të huaj që përpiqet të hyjë.
Nga ana tjetër, ushtria amerikane ka bërë të ditur se operacioni i saj do të mbështetet nga një forcë e konsiderueshme, përfshirë shkatërrues me raketa, mbi 100 avionë luftarakë dhe rreth 15 mijë trupa në terren.
Rreth 2000 anije nuk kanë mundur të largohen nga ngushtica që nga fillimi i luftës SHBA-Iran, tha javën e kaluar kreu i Organizatës Ndërkombëtare Detare.
