Presidenti amerikan Donald Trump do të nënshkruajë projektligjin për të shmangur mbylljen e Qeverisë amerikane, dhe më pas do të shpallë gjendjen e emergjencës kombëtare për të financuar projektin e tij për murin me Meksikën.
Legjislacioni në fjalë të cilin pritet ta nënshkruajë Trump përfshin 1.3 miliardë dollarë për ndërtimin e murit.
“Presidenti është duke realizuar sërish premtimin për ndërtimin e murit, mbrojtjen e kufijve dhe sigurimit të shtetit tonë. Presidenti do të marrë një tjetër vendim ekzekutiv, duke përfshirë emergjencën kombëtare, për t’u siguruar se do të ndalohet kriza humanitare dhe ajo e sigurisë në kufi.”
Shtëpia e Bardhë njoftoi se ai pritet të firmose projektligjin siç e kishte premtuar, por do të ndërmarrë edhe hapa për të anashkaluar Kongresin dhe për të përdorur fondet ushtarake për murin kufitar SHBA-Meksikë.
Udhëheqësi i shumicës së Senatit, Mitch McConnell e njoftoi planin vetëm pak përpara se Dhoma e Përfaqësuesve të votojë për projektligjin e kompromisit. Megjithatë, drafti duhet të miratohet fillimisht në Kongres, para se të nënshkruhet nga presidenti.
Kryetarja e Dhomës së Përfaqësuesve, Nancy Pelosi ka deklaruar më herët se do ta sfidojë ligjërisht në emër të demokratëve, nëse presidenti shpall gjendjen e emergjencës.
