Maqedonia e Veriut pësoi një tronditje pas dorëzimit të dorëheqjes së Arben Taravarit nga posti i ministrit të Shëndetësisë.
Në një intervistë për mediat vendase, Zëvendëskryeministri i parë i Maqedonisë së Veriut, Izet Mexhiti, deklaroi se përfaqësuesit e Aleancës për Shqiptarët do të mbeten brenda koalicionit VLEN.
“Ai ka dhënë dorëheqjen është zoti Taravari, kjo nuk do të thotë që Aleanca të mos mbetet në kuadër të VLEN-it. Ne jemi aleancë dhe do vijojmë si aleancë. Brenda Aleancës për Shqiptarët ka një debat të nxehtë, debat të ashpër, argumentues dhe informatat i kam që pjesa më e madhe nuk pajtohen me veprimet e liderit të tyre. Pasi kontribuan për ndryshimin, ata nuk duan të rikthehen në kthetrat e BDI-së apo Frontit Europian, dhe një pjesë e tyre do të vijojnë të qëndrojnë si pjesë e VLEN-it,” tha Izet Mexhiti.
Mexhiti ishte i paqartë në lidhje me arsyet që e çuan drejt dorëheqjes Taravarin.
“Jo vetëm ne të VLEN-it, po të gjithë nuk e kanë të qartë pra për veprimet të papritshme të tij, një pjesë dyshon edhe për shantazh… nuk ka arsye që pas disa muajsh të sjellësh konkluzione, se askush nuk ka pritur një ndryshim të menjëhershëm e gjithë ajo që ka qenë e instaluar prej dekadash këtë,” tha Mexhiti.
Mospajtimet në koalicionin VLEN kanë filluar më shumë se një muaj më parë, kur Aleanca për Shqiptarët e udhëhequr nga Taravari vendosi të marrë pjesë në zgjedhjet e ardhshme lokale me listat e veta për këshilltarë.
Pas këtij vendimi, partitë partnere në koalicionin VLEN e akuzuan për bashkëpunim me opozitën, konkretisht me BDI-në.
/vizionplus.tv
