Një sulm i armatosur në Turqi ka lënë të paktën 4 persona të vdekur dhe 8 të plagosur pranë qytetit të Mersinit. Ngjarja ndodhi në zonën e Tarsusit, ku një 17-vjeçar i armatosur me pushkë gjahu hapi zjarr në disa vende të ndryshme, raportojnë mediat turke.
Sipas agjencive DHA dhe IHA, sulmi nisi në një restorant, ku u vranë pronari dhe një punonjës, ndërsa disa klientë mbetën të plagosur.
Më pas, autori dyshohet se qëlloi dhe vrau edhe dy persona të tjerë gjatë largimit nga vendngjarja. Policia turke ka nisur një operacion të gjerë kërkimi për kapjen e autorit, i cili ndodhet ende në arrati.
