Një efektiv policie është plagosur me armë gjatë mbrëmjes së të dielës në Shkozë ndërsa ndodhej jashtë shërbimit.
Agjenti i krimeve Anxhelo Kumaraku ndodhej jashtë shërbimit ndërsa në momentin e ngjarjes ai ishte pranë banesës, i shoqëruar nga fqinji i tij.
Ky i fundit rezulton me precedentë penal pasi ndodhet në arrest shtëpie për armëmbajtje pa leje, masë të cilën e thyente pasi dilte nga banesa.
Burime bëjnë me dije se policia e Tiranës ka shpallur në kërkim dy persona si autorë të dyshuar për plagosjen e policit Kumaraku.
Të njëjta burime konfirmojnë se të shpallurit në kërkim janë dy vëllezër që dyshohet se kanë pasur një konflikt për një çështje borxhi me fqinjin e efektivit.
Mësohet se pak muaj më parë për shkak të këtij konflikti, fqinji i policit i ka dhunuar vëllezërit dhe në shenjë hakmarrje ata dyshohet se kanë tentuar ta qëllojnë mbrëmjen e së dielës me armë, por plumbat kapën policin duke e plagosur në këmbë jashtë rrezikut për jetën.
Ndërkohë po verifikohet fakti nëse plumbave i është përgjigjur edhe efektivi Anxhelo Kumaraku.
Në pyetje nga kolegët e tij është marrë efektivi i plagosur i cili ka thënë se nuk e ka raportuar faktin se fqinji i tij thyente masën e sigurisë duke dalë nga banesa pasi e njihte që në fëmijëri dhe e kishte shok. Policia e Tiranës vijon hetimet për zbardhjen e plotë të ngjarjes, ndërkohë e përfshirë në hetime është dhe Agjencia e Mbikëqyrjes Policore.
