Të paktën tre persona kanë vdekur dhe shtatë janë zhdukur pasi një varkë me emigrantë u përmbys në brigjet e Spanjës jugore në Mesdhe, tha sot shërbimi i shpëtimit detar i Spanjës.
Agjencia tha se një tjetër anije dërgoi thirrjen për ndihmë në orën 8 të mëngjesit me orën lokale kur pikasi anijen e zezë gjysmë të zhytur në ujë.
Ekipet e shpëtimit gjetën pesë pasagjerë në bord, tre prej të cilëve ishin të vdekur. Dy të mbijetuarit u transportuan me helikopter në spital dhe ndodhen në gjendje të rëndë, duke vuajtur nga hipotermia.
Të mbijetuarit i thanë personelit të shpëtimit se gjithsej 12 persona ishin në bord kur anija u largua nga Algjeria gjashtë ditë më parë.
Kjo nxiti një operacion kërkimi për shtatë personat që besohet se janë të zhdukur.
Data dhe vendi i zhdukjes së tyre është i paqartë, tha agjencia.
Ajo shtoi se një aeroplan i Frontex po ndihmon përpjekjet e kërkim-shpëtimit, të cilat pengohen nga erërat e forta.
