Një avion është rrëzuar pak minuta pas ngritjes nga toka në SHBA. Si pasojë ka humbur jetën një biznesmen i njohur i çelikut dhe anëtarë të familjes së tij.
Bëhet fjalë për James “Jim” Weller, 67 vjeç, pronar i Liberty Steel Industries Inc., bashkëshortja e tij Veronika, 68 vjeç, djali i tyre John, 36 vjeç, dhe nusja e tyre Maria, 34 vjeç, të cilët po udhëtonin drejt Bozeman, Montana, kur Cessna-ja që i transportonte u rrëzua papritur, sipas stacionit radiofonik ËMFJ.
Në aksident humbën jetën edhe dy anëtarët e ekuipazhit: Piloti Joseph Maxin, 63 vjeç, ish-ndihmës prokuror në Zyrën e Prokurorit të Qarkut Mahoning, dhe bashkëpilot Timothy Blake, 55 vjeç.
Avioni u rrëzua vetëm shtatë minuta pas ngritjes nga Aeroporti Rajonal i Youngstoën-it, herët në mëngjes, pak para orës 07:00. Ai ra rreth dy milje në perëndim të aeroportit, në një zonë të dendur pyjore pranë oborrit të një shtëpie.
Ky aksident përshkruhet si më fatal në historinë e zonës, sipas shefit të Shërbimit të Zjarrfikësve në Hoëland, Raymond Pace. Shpëtimtarët patën vështirësi për të arritur në vendngjarje për shkak të dendësisë së bimësisë, por në fund arritën të nxjerrin trupat e gjashtë viktimave.
“U dëgjua si një bombë,” tha një banore e zonës, Sarah Thompson, për gazetën Times Leader. Fqinjët raportuan një zhurmë të fuqishme që ngjante me rrufe dhe një re të dendur tymi.
Komisioni Kombëtar i Sigurisë së Transportit (NTSB) po heton shkaqet e aksidentit, ndërsa Administrata Federale e Aviacionit (FAA) po ndihmon në hetime, sipas procedurave.
