Sulmet izraelite nuk kanë ‘kursyer’ as spitalet, duke shkaktuar kaos tek pacientët dhe stafet mjekësore. Si pasojë e një sërë shpërthimesh në qytetin jugor të Rafah është dëmtuar një qendër shëndetësore, si dhe pranë saj është shembur një ndërtesë rreth gjysmë kilometër nga kufiri egjiptian.
Situata e krijuar ka sjellë edhe njëherë reagimin e Organizatës Botërore të Shëndetësisë ku përmes një deklarate bëhet me dije se tre të katërtat e spitaleve të Gazës tani janë jashtë funksionit. Shkak janë bërë sulmet e vazhdueshme, por edhe mungesa e theksuar e furnizimeve me medikamente, duke nisur që nga anestezia.
Autoritetet lokale të drejtuara nga Hamasi pretenduan se sulmet ajrore vranë 12 civilë si dhe plagosën dhjetëra të tjera.
Nga ana tjetër, ushtria izraelite thotë se ka kryer sulme kundër më shumë se 300 objektivave rreth Gazës në 24 orët e fundit, duke argumentuar se ka goditur vetëm objektet në të cilat kishte informacion se strehoeshin anëtarë të Hamasit./vizionplus.tv/
