Kapet i kërkuari për atentatin, Besnik Kolndreu akuzohet se fshehu makinën e tre autorëve të vrasjes së çiftit Mujeci

Pas afro dy muajsh nga vrasja e çiftit Mujeci ne Balldre te Lezhës, ka rënë në prangat e policisë Besnik Kolndreu, i akuzuar si i përfshirë në ekzekutimin e Kreshnik dhe Gentiana Mujecit në 26 prill.

Kolndreu është arrestuar në Malin e Zi. Ai dyshohet se ka fshehur në banesën e tij automjetin e përdorur nga autorët në krim, edhe pse më herët ka pretenduar se nuk ka lidhje me ngjarjen.

Kolndreu ishte shpallur në kërkim në zbatim të vendimit të Gjykatës së Lezhës, e cila i kishte caktuar atij masën e sigurisë “Arrest në burg”.

Nga veprimet hetimore ka rezultuar se Besnik Kolndreu ka ndihmuar autorët e atentatit, duke fshehur në banesën e tij automjetin e përdorur prej tyre pas ngjarjes. Makina u gjet dhe u sekuestrua nga agjentët, gjatë kontrolleve të kryera në zonë.

Kreshnik dhe Gentjana Mujeci u ekzekutuan më 26 prill 2026, në Balldren: autorët i zunë pritë makinës së tyre dhe qëlluan me breshëri plumbash.

Ngjarja rezultoi të kishte motiv hakmarrjen. Policia identifikoi tre autorë të dyshuar: Renato Mhillaj, Adriano Mhillaj dhe Florin Mhillaj.

Atentatori kryesor dyshohet se kreu krimin për të marrë hakun e babait të tij, për vrasjen e të cilit 10 vite më parë akuzohej Kreshnik Mujeci.

Të tre personat ndërkohë vijojnë të jenë në kërkim.