Rama: Shkodranët të shohin kalin që i çon matanë lumit

Kryeministri Edi Rama u bëri thirrje shkodranëve këtë të enjte që në 25 prill të mos votojnë bazuar në bindjet politike, por duke vlerësuar punët e bëra.

Gjatë një takimi me kandidatët socialistë në Qarkun e Shkodrës, Rama renditi disa projekte që ka në mendje, nëse mandatohet sërish nga qytetarët.

“Kemi dhënë një shembull shumë të mirë për zonën e Shirokës që ka zhvillim shumë të mirë turizmi. Jemi gati për projektin për vijën liqenore për ta transformuar si lungomarja e Vlorës, apo si ajo e Himarës apo si ajo e Durrësit.  Për të gjitha këto kemi nevojë për besimin e shkodranëve dhe shkodraneve që është koha të shohin Shkodrën të parën, të shikojnë kalin që e çon matanë lumin dhe jo mbi gomarin e tifozllëkut partiak. Në Malësi të madhe kemi hapur jo thjesht një rrugë të re, që të çon në kufi aty ku gjenden një parajsë e Shqipëri, por kemi hapur një rrugë të re për turizmin. Në atë zonë bukuria ka qenë gjithmonë aty, por kushtet infrastruktura nuk stimulon ardhjen e vizitorëve. Mjafton të shihet Tamara si ishte dhe se si është, ku maksimumi mund të gjeje dyer për të luajtur bingo, ndërsa sot ajo ekonomi e vogël po ecën.”