Kryeministri Edi Rama ka njoftuar se 20 shkolla në Tiranë janë pajisur me kamera inteligjente, në kuadër të planit për forcimin e sigurisë në institucionet arsimore në të gjithë vendin.
Rama kujtoi ngjarjen tragjike të ndodhur në shkollën “Fan Noli” të Tiranës, ku u vra Martin Cani, pas së cilës, tha se mori përsipër të sillte teknologjinë më të avancuar në shërbim të sigurisë në shkolla.
“Kur një tragjedi e tmerrshme në një shkollë të Tiranës mbajti frymën e mbarë Shqipërisë, kamerat nuk na ndihmuan dot mjaftueshëm për të kuptuar dinamikën e asaj ngjarjeje”, shprehet kryeministri.
Sipas Ramës, kamerat e reja nuk kufizohen vetëm në monitorimin e ambienteve, por kanë aftësi për të identifikuar dhe sinjalizuar në kohë reale situata të caktuara, duke njoftuar drejtuesit e shkollave, punonjësit e sigurisë apo Policinë e Shtetit.
“Këto kamera janë vendosur dhe do të vendosen po aty ku ishin të vjetrat, po ndryshe nga të vjetrat, ato jo vetëm shohin edhe sinjalizojnë në kohë reale drejtorinë, punonjësit e sigurisë apo vetë Policinë e Shtetit duke i ndihmuar ata të kapin shpejt sinjalin, të kuptojnë shumë më mirë për çfarë bëhet fjalë dhe të ndërhyjnë pa humbur kohë. Këto 20 shkolla janë vetëm pararoja e procesit”, tha Rama.
Kryeministri theksoi se 20 shkollat e Tiranës janë vetëm faza e parë e këtij procesi, ndërsa pajisja me teknologji inteligjente do të shtrihet gradualisht në shkolla të tjera në vend.
“Zotimin e bërë pas asaj tragjedie, do ta bëjmë realitet shkollë pas shkolle, me teknologjinë në shërbim të njeriut dhe me sigurinë e fëmijëve mbi gjithçka”, përfundoi Rama.
