Kryeministri në ikje i Kosovës, Ramush Haradinaj përshëndeti krijimin e qeverisë së re. Ai tha në “Facebook” se ky është një lajm i mirë, ndërsa bëri me dije se mandatin e tij do ta dorëzojë zëvendëskryeministri Behgjet Pacolli.
“Votimi i Qeverisë së re nga ana e Parlamentit të Kosovës është lajm i mirë për gjithë qytetarët tanë. Uroj që ky konstalacion politik të arrij t’i çoj përpara proceset e rëndësishme për vendin. Në këto ditë, unë po qëndroj për një vizitë zyrtare në Shtetet e Bashkuara të Amerikës, një agjendë që është caktuar shumë kohë më përpara dhe kësisoj pranim – dorëzimi i mandatit, formalisht do të bëhet nga ana e ZëvendësKryeministrit të parë z. Behgjet Pacolli, të cilën procedurë tashmë e kam autorizuar.”
Haradinaj deklaroi se tashmë është koha që qeveria e re t’u dalë për zot çështjeve më të rëndësishme për qytetarët. Edhe Presidenti i Kosovës, Hashim Thaçi kërkoi që të mbahen premtimet e dhëna ndaj qytetarëve.
