Kryeministri i Nepalit, K.P. Sharma Oli, njoftoi dorëheqjen e tij sot, një ditë pas protestave të ashpra kundër bllokimit të rrjeteve sociale dhe korrupsionit në vend, të cilat u shtypën me dhunë nga policia dhe shkaktuan vdekjen e 19 personave.
“Kam dorëzuar dorëheqjen time sot nga posti i Kryeministrit (…) me qëllim që të hapet rruga për një zgjidhje politike dhe për të trajtuar problemet e vendit”, thuhet në letrën e tij drejtuar Presidentit, e cila u transmetua nga mediat.
73-vjeçari Oli u betua në korrik të vitit të kaluar për mandatin e tij të katërt si Kryeministër, duke u bërë i 14-ti në këtë post që nga heqja e monarkisë në vitin 2008.
Pavarësisht ndalimit të lëvizjes pa afat të vendosur nga autoritetet, mijëra qytetarë dolën sërish në rrugë duke protestuar kundër korrupsionit dhe qeverisë. Ata hodhën parulla kundër Kryeministrit dhe kundërshtuan bllokimin e mediave sociale.
Protestat vazhduan me intensitet edhe sot, me protestues që dogjën zyrat e partisë në pushtet. Sipas “The Guardian”, mijëra protestues kanë hyrë në ndërtesën e Parlamentit dhe i kanë vënë flakën njërës prej godinave.
/vizionplus.tv
