Edhe pse prej më shumë se 2 vitesh opozita kishte kërkuar zgjedhje të parakohshme dhe zhvillimin e tyre pa Edi Ramën kryeministër, tashmë ajo duket një gjë e largët. Mëngjesin e të premtes, të gjithë drejtuesit e partive politike, me radhë mbërritën në selinë e Presidencës, për tu konsultuar me kreun e shtetit për caktimin e datës së zgjedhjeve të ardhshme parlamentare, jo të parakohshme. Pas Idrizit, Madhit, Dules, Shehit, Tafajt, Ndokës, në orën 11:00 nga dera kryesore e Presidencës mbërriti Edi Rama, i shoqëruar nga Taulant Balla.
Edhe pse në axhendë ishte parashikuar që takimi do të zgjaste 60 minuta, Edi Rama, i vetmi që mbajti maskë gjatë takimit me Ilir Metën, qëndroi vetëm 15 minuta. Minuta gjatë së cilave ai ka bërë vetëm një kërkesë: zgjedhjet mos të mbahen më 2 maj, ditë që përkon me Pashkët Ortodokse. Kërkesë të cilën e kishte artikuluar edhe më parë Dashamir Shehi. Rama u largua, pa komentuar asgjë lidhur me takimin e tij me Ilir Metën.
Në mesditë ishte radha e Lulzim Bashës, i cili i shoqëruar nga Oerd Bylykbashi, qëndruan në zyrën e kreut të shtetit, aq sa ishte parashikuar dhe në axhendë, 30 minuta. Në fund të takimit, Lulzim Basha në një prononcim për mediat, artikuloi nevojën për zgjedhje të menjëhershme.
Basha huazoi një shprehje të Nënë Terezës, për të treguar se e djeshmja dhe aksionet e kaluara, tashmë janë kapitull i mbyllur.
Për herë të parë në institucionin e Presidentit të Republikës, ka shkelur në cilësinë e kryetares së LSI-së, Monika Kryemadhi. Takim i cili sipas saj i ishte kërkuar nga partia.
Por ndryshe nga Basha, i cili u shpreh se zgjedhjet duhet të ishin bërë sot, Kryemadhi kishte tjetër qëndrim.
Edhe pse në tryezë janë 4 data nga të cilat kreu i shtetit mund të zgjedhë, pjesa më e madhe e liderëve politikë i kanë sugjeruar datën 18 prill për zhvillimin e zgjedhjeve. Dilemë e cila pritet të përfundojë pasditen e sotme, kur Meta do të takohet dhe me përfaqësuesit e opozitës parlamentare dhe më pas pritet të publikojë dekretin.
