Drejtori i Përgjithshëm i Policisë së Shtetit, Ardi Veliu inspektoi mbrëmjen e së mërkurës pikat e kontrollit që janë ngritur për të monitoruar qarkullimin e drejtuesve të mjeteve dhe pasagjerëve që kanë ardhur nga shtete të prekura me koronavirus.
“Makinat duhet të kontrollohen të gjitha, pa përzgjedhje dhe pa përjashtim. Duhet të kontrollojmë çdo makinë, sidomos ata që 15 ditëshin e fundit kanë ardhur nga jashtë sidomos nga Italia. Këtyre shtetasve duhet t’u bëjmë të qartë se duhet të vetëkarantinohen dhe të telefonojnë 127 për çdo problem. Kjo punë do vazhdojë sot deri në 12 dhe nesër do të rinisë sërish në 5:30 të mëngjesit. Grupet e FNSH për rastet e rezistencës”, tha Veliu.
Ndërkohë, ministrja e Mbrojtjes, Olta Xhaçka pohoi se Forcat e Armatosura dhe Policia e Shtetit do të bashkëpunojnë për të kontrolluar të gjithë ata që kanë udhëtuar në vendet më të prekura me COVID 19, për të siguruar respektimin e masave për parandalimin e përhapjes së virusit.
