Një 30-vjeçar në Britani është dënuar me dy vjet e katër muaj burg pasi në prill 2025 u përplas me makinën e tij mbi disa automjete të ndaluara në autostradë në Derbyshire, teksa ishte i përqendruar duke luajtur lojëra fati në telefon.
Sipas pamjeve të regjistruara nga kamera e një automjeti tjetër, makina e drejtuar nga 30-vjeçari Jack Bentley u përplas pa frenuar me automjetet që kishin ndaluar për shkak të trafikut.
Në njërën prej makinave ndodhej një grua shtatzënë, e cila pësoi frakturë në legen dhe u dërgua me urgjencë në spital, ku solli në jetë foshnjën para kohe. I porsalinduri u shtrua në terapi intensive. Përveç saj, u lënduan edhe drejtuesi i mjetit, dy fëmijë dhe qeni i familjes.
Pas arrestimit në vendngjarje, analizat e të dhënave nga telefoni i Bentley-t treguan se ai po e përdorte pajisjen gjatë drejtimit të mjetit për të vizituar faqe të lojërave të fatit online.
Oficeri i policisë, Richard Morris, që drejtoi hetimet, e cilësoi ngjarjen si një “shembull tronditës të drejtimit të papërgjegjshëm”, duke theksuar se shoferi kishte kaluar pjesën më të madhe të udhëtimit i shpërqendruar nga telefoni. Sipas tij, nga pamjet ishte e qartë se, po të kishte qenë i vëmendshëm, do ta kishte parë kolonën e makinave përpara dhe do të kishte arritur të ndalonte në kohë.
Në dëshminë e saj në gjykatë, gruaja që lindi para kohe e përshkroi ndërhyrjen urgjente me operacion si “shumë traumatike”, duke treguar se foshnja pësoi kolaps të njërit mushkëri dhe më pas edhe të tjetrit, ndërsa ajo përjetoi momente frike dhe ankthi të madh.
Përveç dënimit me burg, 30-vjeçarit iu hoq e drejta e drejtimit të automjetit për tre vjet e dy muaj.
/vizionplus.tv
