Falë kulturës së internetit, rutinat e bukurisë dhe kujdesit ndaj vetes kanë filluar të praktikohen rreth fillimit të të 20-ave dhe një ndër problematikat të cilat të gjithë duam të parandalojmë është krijimi i rrudhave. Këtu hyn në lojë përdorimi i RETINOLIT. Nuk ka mbetur njeri që nuk e ka dëgjuar emrin e këtij serumi dhe përfitimet e tij fantastike në ngadalësimin e shenjave të plakjes dhe zhdukjes së akneve. Ky serum përdoret nga të gjithë, duke nisur nga njerëz të përditshmërisë e deri tek yjet e Hollivudit si Jennifer Garner dhe Cindy Crawford ndër të tjera. Retinoli është një derivat i vitaminës A të cilin e gjejmë si pjesë përbërëse të shumë kremrave. Ndonëse për pjesën më të madhe të njerëzve, ai nuk shkakton probleme, lëkurat e ndjeshme kanë tendencën të reagojnë jo mirë duke u skuqur dhe acaruar. Ju kujtojmë se retinoli mund t’ju shkaktojë akne edhe nëse nuk e përdoni siç duhet ndaj sigurohuni se po ndiqni udhëzimet përpara se të dilni në përfundimin se nuk bën për ju. Përdoreni vetëm në mbrëmje pasi ai është një aktiv fotosensitiv i cili nuk reagon mirë kur e prekin rrezet e diellit. Nëse jeni fillestarë në përdorimin e retinolit, sigurohuni të mos e përdorni më shumë se 2 herë në javë dhe mos ta përzjeni me acidin laktik. Ju këshillojmë ta nisni pas moshës 25 vjeçare.
Për lëkurat e ndjeshme të cilat nuk përshtaten dot me retinolin, ne ju këshillojmë disa serume të cilat kanë efekte më të buta:
Serumi me bakuchiol
Bakuchiol merret nga gjethet dhe farat e bimës indiane “babchi” dhe serumet që kanë këtë përbërës stimulojnë prodhimin e kolagjenit. Ai është i pasur me antioksidantë, ka veti anti-inflamatore dhe tolerohet mirë nga lëkurat e ndjeshme. Fiks si retinoli, bakuchiol-i rezulton i suksesshëm kundra rrudhave dhe rrit elasticitetin e lëkurës. Duke qenë se nuk është derivat i vitaminës A, mund ta përdorni nëse jeni shtatzënë.
Vaji i trëndafilit
Vaji i trëndafilit është perfekt për të rigjeneruar lëkurën dhe për t’i dhënë asaj shkëlqim. Ai hidraton thellësisht dhe ndihmon në rregullimin e barrierës duke rritur prodhimin e kolagjenit. Përbëhet nga vitamin K dhe E.
Vaji i farës së karrotës
Një tjetër alternativë e cila mund të zëvendësojë retinolin në rutinën tuaj është vaji që merret nga farat e karrotës. Ky vaj është i pasur me beta-karoten i cili vjen nga vitamina A dhe stimulon procesin e rigjenerimit të qelizave duke ngadalësuar plakjen. Ai përbëhet nga antioksidantë dhe vitaminat C & E të cilat krijojnë një barrierë të shëndetshme dhe i japin fytyrës shkëlqim./Living/
