Një 42-vjeçar me origjinë shqiptare është shoqëruar nga karabinierët në Bari, pasi partnerja e tij, Ornella Forastefano, 46 vjeçe, humbi jetën në rrethana që po hetohen nga autoritetet italiane. Sipas mediave vendase, ai ishte personi mbi të cilin u përqendruan dyshimet që në orët e para pas ngjarjes.
46-vjeçarja u gjet gjatë natës pranë urgjencës së spitalit në Trebisacce, në provincën e Kozencës. Mjekët ndërhynë menjëherë për t’i dhënë ndihmën e parë, por ajo nuk arriti t’u mbijetonte plagëve të rënda.
Sipas hetimeve paraprake, një nga pistat kryesore është se gruaja është rrahur brutalisht dhe më pas është lënë pranë spitalit. Fillimisht karabinierët nisën kërkimet për partnerin e saj, ndërsa paraditen e së dielës ai u lokalizua në në portin e Barit ku ishte bërë gati për të ikur nga vendi, dhe më pas u shoqërua në ambientet e karabinierëve, ku po merret në pyetje.
Hetimet po drejtohen nga Prokuroria e Castrovillarit, e cila pritet të sqarojë dinamikën e plotë të ngjarjes. Ndërkohë, Bashkia e Trebisacce ka shprehur ngushëllimet për familjen e viktimës, duke u solidarizuar veçanërisht me fëmijët e saj dhe duke kërkuar që autoritetet të zbardhin sa më shpejt rrethanat e kësaj ngjarjeje.
