Një seri sulmesh me dronë shënjestruan rajonet e Moskës dhe Rostovit gjatë natës më 16 gusht, duke shkaktuar zjarre në disa depo dhe duke rezultuar në viktima.
Në qytetin Podolsk, një sulm me dron shkaktoi zjarr në një depo të Wildberries në parkun industrial Koledino, tha guvernatori i rajonit të Moskës, Andrei Vorobyov.
Vorobyov tha se të gjithë punonjësit ishin evakuuar dhe se askush nuk ishte lënduar. Videot treguan një zjarr të madh në këtë lokacion, me përpjekjet për shuarjen e tij nga helikopterët. Objekti në Koledino është një nga depot më të mëdha të Wildberries.
Objekti është shënjestruar vazhdimisht në kuadër të një fushate më të gjerë kundër depove të Wildberries në të gjithë Rusinë që nga mesi i korrikut.
Reuters raportoi në fund të korrikut se të paktën shtatë nga depot e shitësit me pakicë ishin dëmtuar brenda pak ditësh, ndërsa AP tha se më shumë se një duzinë objektesh ishin sulmuar deri në fillim të gushtit.
Autoritetet ukrainase pretendojnë se depot e kompanisë së tregtisë elektronike janë të përfshira në furnizimin e nevojave të ushtrisë ruse. Wildberries dhe Kremlini e kanë mohuar këtë.
Një zjarr i dytë u raportua në një depo që përmban ilaçe në Domodedovo, në jug të Moskës. Analistët e identifikuan atë si një objekt magazinimi të qendrës logjistike Severnoye Domodedovo. Kanalet ukrainase të monitorimit publikuan video të shumta që tregonin depo në flakë.
Vorobyov tha se një burrë i moshuar u vra pasi një dron goditi një shtëpi private në distriktin Ramensky të rajonit të Moskës. Ai raportoi gjithashtu për gjashtë persona të lënduar.
Veçmas, kryetari i Moskës, Sergei Sobyanin, tha se tre persona u lënduan pranë Unazës së Moskës, pa specifikuar rrethanat.
Ndërsa, në rajonin jugor të Rostovit, guvernatori Yury Slyusar raportoi se tre persona u vranë dhe një u lëndua në një sulm. Ai nuk specifikoi se cili objekt apo zonë ishte shënjestruar.
Vorobyov e përshkroi sulmin ndaj rajonit të Moskës si një nga më të mëdhenjtë në kohët e fundit. Sobyanin tha se rreth 600 dronë kishin fluturuar drejt Moskës që nga mbrëmja e 15 gushtit, ndërsa 201 prej tyre ishin shkatërruar mbi rajonin e Moskës.
Ministria ruse e Mbrojtjes, veçmas, raportoi se 822 dronë ishin rrëzuar gjatë natës, pa specifikuar se sa dronë nuk ishin kapur.
Ushtria ukrainase nuk ka komentuar sulmet.
Ndërkohë, sulmet ruse me raketa dhe dronë gjatë natës në Ukrainë vranë të paktën një person dhe plagosën rreth 20 të tjerë, thanë zyrtarët ukrainas.
Në Kryviy Rih, një objekt industrial u dëmtua, duke vrarë një person dhe duke plagosur 14 të tjerë.
Kievi raportoi disa zjarre, përfshirë në tregun e librave Petrovka, i cili u shkatërrua pasi mori flakë për herë të dytë. Tre persona u lënduan në Kiev dhe tre të tjerë në rajonin përreth Kievit.
Forcat Ajrore të Ukrainës thanë se Rusia e sulmoi Kievin, Kremenchukun dhe Kryviy Rihun me raketa dhe 106 dronë./rel
