Analisti Ermal Hasimja ka komentuar situatën në Partisë Demokratike pas dorëheqjes së Lulzim Bashës nga posti i kryetarit.
Në një lidhje me skype në studion e lajmeve në Vizion Plus, Hasimja u shpreh se është shumë e rëndësishme që në PD të vijë dikush që t’i kthehet nevojës për përfaqësim.
“Do të ishte mirë që demokratët të mësonin nga fakti se si personazhe të mbështetur në mënyrë artificiale nga jashtë ja dalin që ta bllokojnë partinë për të pasur suksese. PD ka shkuar gjithmonë drejt një profili të masës së turmave duke shmangur nevojat që ka pasur një elektorat i djathtë. Mënyra se si po shkojnë gjerat tregon se nuk do të mësohet shumë nga kjo periudhë. Më e rëndësishmja është se cilido që do të vijë në krye të PD, as Berisha as Basha, t’i kthehet nevojës për parfaqësim”, tha Hasimja.
Ndërkohë ai theksoi se tashmë nuk është më koha e Berishës për të ardhur në krye të PD.
“Damka non grata që mban Brisha është një problem për PD, pavarësisht se problemi më i madh që ka Berisha është fakti i të qenit dikush që është stërprovuar në politikën shqiptare. Nuk është më koha e tij, koha e Berishës ka kaluar në këto moment”, tha ai.
Mes të tjerash, Hasimja u shpreh se PD ose do të bashkohet ose nuk do të ekzistojë më.
“Ajo që do të ndodhë parashikohet lehtë, ose PD do të bashkohet ose pjesa e Foltores do të gllabërojë, korruptojë pjesën tjetër. Edhe nëse nuk bashkohen do të ketë rjedhje të ndryshem derisa PD të mos ketë më një peshë, të mos ekzistojë”, përfundoi Hasimja.
