Pas tërmetit të fuqishëm të orës 3:54 të mëngjesit të së martes dhe bilancit të thelluar në viktima, toka ende nuk ka rënë në qetësi.
Paniku dhe tmerri te banorët është ende i madh, ndërsa pamjet e rrënojave të banesave të dëmtuara janë ende të gjalla për ta.
Që prej mesditës në Thumanë dhe në stadiumin Niko Dovana në Durrës, emergjencat civile kanë nisur montimin e 200 çadrave të cilat do të jenë streha për banorët që kanë mbetur pa çati.
Burime të bashkisë thanë se 100 çadra janë shpërndarë në fshatrat e Durrësit, ndërkohë që po instalohen 50 të tilla në stadium.
Të rriturit dhe fëmijët, për gjatë gjithë ditës kanë refuzuar të kthehen në banesa e ndërsa tashmë janë vendosur në çadrat e ngritura, te cilat do të jenë shtëpia e tyre deri sa te ndihen të sigurt.
Dhjetra banorë janë përgatitur me rezerva ushqimore dhe batanije për të sfiduar temperaturat e ulta gjatë natës, ndërkohë që me ta jane solidarizuar mijëra qytetarë të tjerë.
Autoritetet po merren me sistemimin e personave të mbetur pa shtëpi, ndërkohë që verifikimi i dëmeve të tërmetit pritet të nisë sapo të kalojë periudha e operacionecve të kërkim shpëtimit për të mbijetuarit.
